ijo pona tan jan

kulupu jan li ante mute tan open ona· tenpo pini suli la jan li pali e ijo tawa wile awen ona lon ma· tenpo suli mute la jan li kama sona e nasin pali wawa e sona wawa e ken wawa· ale ni li kama tan pali suli· jan pali li pali suli e ale ni·

taso tenpo ni la jan mani li weka e ijo pona ni tan jan pali· kulupu jan mani li lili· taso ona li jo e wawa mute li ken lawa e pali jan li jo ale e ijo pali jan· ona la jan pali o pali tawa kama suli mani o pali ala tawa wile awen ona·

ijo ale o lon poki jan ale tan ni· jan ale li wile e ona li pali e lili ona· ni la jan ale o jo e ijo ale·

awen pona tawa jan ale

sina kute e nimi 'awen pona o tawa jan ale' la sina ken pilin e ni· ona li kon lawa nasa· taso nimi ni li kon ala li nasa ala· ona o lon li ken lon· awen pona tawa jan ale la ken en wawa en sona li lon jan· taso jan mani li weka e ale ni tan jan pali ona· jan o sona e ni

nasin kulupu kepeken jan lawa ala

jan ale o ken awen o ken awen pona· nasin wan tawa ni li lon· nasin li nasin kulupu kepeken jan lawa ala·

weka jo

jan li wile kepeken nasin kulupu kepeken jan lawa ala la kulupu jan o weka e jo tan jan mani o weka e jo tan ma lawa poki· jan ale o kama e ni

jan li lawa e ma la ni li ken tan pali suli tan jan pali· jan li jo e ma la ni li kama tan ni· jan pali li jo ala· sama la jan mani li jo la ni li kama tan ni· jan pali li jo ala· ma ale la sina ken lukin e ni· jan mani li jo mute la jan pali li jo ala· nasin kulupu kepeken lawa ala la jan mani o lon ala tan ni· jan li ken jo e ijo wile ale e ijo pona ale la jan li pana ala e pali suli ona tawa jan mani ike·

pan

tenpo nasa ni la kulupu jan li ken pali e ijo wile mute· kepeken ilo la pali jan li ken kama lili· taso nanpa ijo wile li awen suli· kulupu jan li sona e nasin pali pona tawa ijo wile ale· jan ale la

sona ni la mi ale li ken alasa e nasin pona· nasin mani la jan pali en ilo o pali e ijo mute· taso jan ale li jo e ijo pali wile ni· jan mani li poki e ijo ni· nasin kulupu la mi ale li ken jo e ijo pali ona e ijo pali tan ilo· nasin li lon· mi ale o weka e nasin pali tan jan mani o pana e nasin pali tawa jan pali· pan o lon luka jan ale·

suwi en musi

jan li wile e ijo mute· jan li wile e moku e tomo e len e jan ante· taso ijo pona ante li lon· jan li wile ala e ijo pona· taso ijo pona li pona tawa jan· ijo suwi li wile ala· taso suwi li pona tawa jan· ijo musi li wile ala· taso musi li pona tawa jan· nasin mani li weka la jan li ken pali lili li ken jo e ijo wile ale· ni la tenpo mute li awen open· jan li ken musi li ken pona kepeken tenpo mute ni· suwi en musi ni li pona· nasin kulupu kepeken jan lawa ala la jan o musi o suwi· nasin ni la ijo musi anu ijo suwi li pona tawa kulupu la kulupu ni li pali e musi anu suwi ni·

utala nasin

jan li awen lon nasin mani la nasin kulupu li ken ike lukin tawa jan· ona li ken pilin e ni· pali li pana ala e mani la jan li wile ala pali· taso ni li lon ala· nasin kulupu la jan li pali lili tawa ijo wile li ken kepeken tenpo tawa ijo pona ona· awen pona ni la nasin ni li pona lukin tawa jan· kin la pali li pona tawa pilin jan· jan li pali e ijo suli kepeken luka ona la jan li pilin pona· nasin kulupu la jan li pali e ijo wile e ijo ken ona· kin la jan lon nasin mani li ken pilin e ni· nasin kulupu li sama nasin ma lawa poki· taso lon la nasin kulupu o kepeken ala nasin ni· ma lawa poki li poki e jan li poki e ma· nasin ni li ike sama nasin mani· jan mani anu jan lawa ma li poki e ijo jan e ma jan la ale li awen ike·

pali pan

tenpo ni la sina ken lukin e nasin pona e nasin namako tawa pali pan· jan li sona e nasin kasi e nasin kili e nasin pan· wile sewi mi la kulupu jan ale o kepeken nasin pona tawa ni· jan ale li ken jo e kasi e kili e pan ni·

---